الإحسان وبائعة البقدونس

الإحسان وبائعة البقدونس نتعلم منها أن الخير موجود في البلد دي مهما كنا مش قادرين نشوف فيها غير السئ لنتعرف على تفاصيل القصة:

سيدة تبيع شبت وبقدونس على ظهر قفص مقلوب على اﻷرض.. وجهها به منحنيات من آثار تعرضها للشمس.. كنت انتظر صديقى في السيارة بجوارها وسمعت هذا الحوار بينها وبين بائعة أخرى.

-الواد سابلي البيت وهج.. عايز حنفية فلوس.. عشان قلتله يابني بقالي 4 شهور ماجبتش الدواء.. عايزة اجيبه مرة قبل ما اتكوم جنبك ونجوع إحنا اﻷثنين.. شوح فيا ومشي ومدخلش البيت بقاله 3 أيام..

- يا لهوي ياختي الواحد يربي ويكبر وفي الاخر يترمي.. ربنا معاكي يام عبده إن شاء الله بيجيلك هيروح فين يعني..

المهم قررت انزل اشتري منها اي حاجة.. وأدردش.. سألتها:
انت مش محتاجة حاجة يا أمي؟

قالتلي تسلم مستورة.. ورفضت تاخد أكتر من ثمن البقدونس.. أصل مافيش حاجة توجع قد واحد فقير وعفيف.. بس قلت هاحاول برضو..
قلتلها طيب يا حاجة أنا سمعتك وأنت بتتكلمي عن الدوا بصراحة وعايز اجيبه لك.. ممكن اسمه؟ بصت في اﻷرض.. مزيج من العفة والإحتياج والفرحة والحياء.. ست عظيمة الحقيقة..

قالت لي والنبي يا بنى ماعرف اسمه هو دواء السكر ب22.5 وحبوبه صفراء كده..

قلت خلاص هاحاول اوصله.. رحت الصيدلية وسألت الدكتور هل في دواء كذا كذا قالي يعني اسمه ايه؟
قلت له هو لسيدة غالبا مابتعرفش تقرا فمتعرفش اسمه.. الدكتور فضل يدور على الكمبيوتر ووصل له في الاخر.. وبدل علبتين لقيته أعطاني شنطة فيها الدواء.. سألته كام؟

قاللي ده هدية مني ليها.. وقول لها أول الدواء مايخلص هتاخده من عندي ببلاش.. ربنا يكرمك.. وكتب لي كارت في ظهره "يصرف لحامل هذا الكارت الدواء كذا بالمجان" .

الست كانت بتبكي وهي ماسكة الدواء ابو 22.5!! والكارت!

هو ده المعنى الحقيقي لﻹحسان عارف ... لما تكون مش عارف تفرح بأم مكافحة ولا ست قنوعة وراضية ولا دكتور طيب جميل ولا بربك الكريم الرحيم قبل كل شئ ؟..

اتمنى ان تكون القصة نالت على إعجابك وتكون استفدت معنا