ارتفاع الحرارة عند الاطفال

فى هذا الموضوع سوف تتعرف كل ام على كل المعلومات الخاصة بارتفاع الحرارة عند الاطفال واسبابها وكيفية التعامل السريع معها بطريقة صحيحة وماهى الاحتياطات الواجب تنفيذها لتقليل الاضرار الصحية على طفلك تابعينا:

ابنك سُخن
اتأكدتي يعني؟؟
سيبك من توقعاتك واحساس ايدك وهاتي ترمومتر وقيسي درجة الحراره

طيب !!عارفه ان الترمومتر انواع
*زئبقي ودا الادق
*ديجيتال ودا المفضل
*رقمي بيقيس من الجبهة او عبر الاذن
*شريط ..ولا ليه لازمه لانه بيقيس درجة حراره الجلد فقط وممكن يكون مؤشر خاطئ

طيب !! عارفه ان الحراره الطبيعيه للجسم
من ٣٦.٢ : ٣٧.٥درجة مئويه
بمتوسط ٣٧ درجه

طيب !! عارفه ان الحراره درجات
-دافي ودا من ٣٧.٥ الي ٣٨
-سخن فوق ٣٨.٥ low grade fever
-سخن جدا فوق٣٩.٥ high grade fever

طيب !! عارفه تقيسي الحراره ازاي
*فتحة الشرج بنقلل نصف درجة
* تحت الابط بنزود نصف درجه
*من الفم زي ماهي بدون زيادة او نقصان
مثلا الحراره بالترمومتر طلعت ٣٨
لو من الفم ٣٨
من تحت الابط ٣٨.٥
من فتحة الشرج ٣٧.٥

طيب!! عارفه تعملي ايه لو ابنك سخن
اول حاجه تخففي هدومه ..موضوع اننا نلبسه كتير لانه بردان دا غلط وبيساعد علي زيادة الحراره والله

الرعشه حاجه طبيعيه لان الجسم في عملية دفاع مع سبب الحراره سواء فيروس او بكتيريا ولازم نساعده بتخفيف الملابس ويشرب سوايل كتير ونعمل كمادات

كمادات !!! وهو بردان
ايوه كمادات ودا الحل الأمثل
وافضل امكانها في الجسم الاماكن اللي فيها اوعية دمويه كبيره وهي
-جانبي الرقبه
-تحت الابط
-اسفل البطن
-الفخذين

وممكن ناخد الطفل لو الحراره اوفر ونحط نصفه الاسفل من السره لتحت واحنا نازلين تحت الميه مباشرة..اونملي الحوض ميه ونحط نصه التحتاني فيها ..او نملي البامبرز ميه ونلبسه ليه

والمياه تكون فاتره مش ساقعه ..الساقعه بتقلب بنتيجة عكسية..وممكن نحط عليها ملعقة (خل) لو الطفل مفيش عنده حساسيه منه..لكن موضوع الكحول دا غلط جدا ..بيمتص عن طريق الجلد وممكن يعمل تسمم لو حصله استنشاق

طيب!! والكمادات الجيل الجاهزه اللي بتتلزق
ممكن نحط واحدة علي البطن والظهر
ونسيبها ٨ ساعات...لكن الكمادات العاديه افضل مية مره

طيب !! والخوافض !!؟؟
-باراسيتامول تحت ٦ شهور
-باراسيتامول وبروفين من ٦شهور لسنه
-دولفين او فولتارين فوق السنه
وكل واحد فيهم بجرعاته المحدده

طيب !! عرفتي سبب الحراره؟؟
مش كل سخونيه نجري علي الدكتور
لو مفيش اعراض غير حراره فقط وبتستجيب للخافض مثل ارتفاع حرارة الجسم بعد التطعيم وأثناء التسنين
نصبر علي الطفل ونشوف
لكن لو الحراره غير مستجيبه وبتعلي ومأثره علي نشاط الطفل او معاها اعراض تانيه يبقي لازم دكتور طبعا

طيب !! روحتي للدكتور وكتبلك علاج خلاص ..
اصبري علي العلاج ومتستعجليش لكن لو الحراره استمرت اكتر من ٣ ايام بدون ما تنزل تدريجياً..ارجعيله اكيد هيفحصه تاني وممكن يطلب تحاليل

طيب !! عارفه انه مش شرط كل حراره سببها يكون بكتيري!!
والفيروسات راحت فين وامراض الغدد وحاجات تانيه كتير ...اقتلي الدكتور اللي جواكي وبلاش تعدي ع الصيدليه وترزعيه مضاد حيوي

طيب !! الولد حرارته عليت واتشنج
اهدي كده وفكيله هدومه وهوي المكان من حواليه ونيميه علي جنبه وابعدي اي حاجه عنه واياك تحطي اي حاجه في بقه
غالبا نوبة التشنج هتنتهي لوحدها لكن لو طولت اكتر من ٥دقايق علي اقرب مستشفي
التشنج وارد في كل الاطفال من ٦ شهور وحتي ٥ سنوات...

مفيش داعي للقلق ولا العرض علي دكتور مخ واعصاب ..الا اذا !!!
*حصلت بدون حراره او بعد ٥ سنوات
*اتكررت اكتر من مرتين قبل سن سنه
*اخدت وقت اكتر من ربع ساعه

طيب !! عرفتوا ان الحراره ممكن تكون صديق واحيانا بتكون عدو

....في النهايه هي علامه بتوضح تعرض الجسم لفيروس او بكتيريا وبدأ يشتغل عليها ..المهم نتعامل معاها ازاي ..زي ما وضحنا

ربنا يحفظ اطفالنا جميعا ويمتعهم بكامل الصحة والعافية اللهم امين
نتمنى ان تكون الفائدة عمت على الجميع وان تكونوا استفدتم معنا