اكلات للدايت والريجيم

زيادة الوزن لها من الاضرار العظيمة على الصحة هذا بجانب الشكل غير المتناسق للجسم التى تجعل المرأة غير راضية عن شكلها وتقل ثقتها فى نفسها لنتعرف سويا على اهم اكلات للدايت والريجيم:

اكلات تنفع للغداء والخاصة للدايت والرجيم

1- البطاطس المتبله:

بقطع البطاطس شرائح سميكه واحطها في ميه وملح عشان تتطرى شويه واجيب بصلة وكام فص ثوم واهرسهم وعليهم فص ليمونه وملح وفلفل وخل وبقدونس وشبت مفروم واغمس شرائح البطاطس فيهم نص ساعه وبعدين اشيلهم وهم فيهم التتبيله وارصهم في صينية وارش عليهم شوية ميه وادخلهم الفرن نص ساعه بتطلع روووووووووووعه بجد

2- سلطة التونه:

بجيب علبة تونه واصفيها من الزيت واغسلها بالميه والخل واجيب طاسة واحط فيها معلقة زيت زيتون صغيره او طاسة تيفال واجيب شرائح الفلفل الاخضر واحمره لحد ما يدبل ولونه يبهت واعصر عليه ليمونه وخل واحط شوية ثوم بودره او بلاش لو مش عايزه واحط علبة التونه واسيبها لحد ما ريحتها تطلع والتونه نفسها تدبل برضه شويه بحط معاها خضره شبت وبقدونس مفروم واسيبها شويه اقدمها في طبق فرشته باوراق الخس وممكن احط عليها علبة زبادي عليها ثوم وملح وفلفل بتبقى تحفه جدا

3- صينية الخضار في الفرن:

بجيب حله واحط فيها بصل مفروم وثوم وملح وفلفل وبهارات وخضره مفرومه وشوية ميه صغيرين واسيبهم يتبلوا بعض والبصل يدبل وبعدين احط معلقتين صلصه واسيبهم يغلوا شويه وبعدين اجيب صينية وارص فيها الخضار جزر وبسله وفاصوليا وبطاطس وكوسه وباذنجان وبصل وطماطم وارش عليهم الصلصه اللي عملتها دي واغطيها بورق فويل وادخلها الفرن نص ساعه او ثلث ساعه حسب حرارة فرنك بتطلع روووووووووعه بجد

4- الاكلات في الفرن بدون زيت (اكلات سريعه):

الوصفه دي شامله الفراخ والسوسيس والفراخ الفيليه والسمك الفيليه وحتى الهمبورجر واي لحوم تحبيها تاخديها وتحطي ميه تغلي على النار فيها معلقتين صلصه وملح وفلفل وبهارات وتصبيها على الوش وتزينيها بالبقدونس والكرفس لو عندك وتحطيها في الفرن لمدة نص ساعه والفراخ لمدة ساعه عشان تستوي كويس بتطلع جميلة جدا وبدون زيت وخفيفه اوي

5- بطاطس بالسوسيس في الفرن:

اقطعي البطاطس نصفين وخليها تتسلق لمدة عشر دقايق بس وبعدين طلعيها واحفري في كل نصف حفرة بالسكينه صغيره واسلقي صباعين او ثلاث اصابع سوسيس وقطعيه حلقات وحطي في كل بطاطسايه قطعة سوسيس وبعدين تبلي البطاطس بالبصل والثوم والملح والفلفل ورصيهم في صينية وزينيها بالبقدونس وحطي شوية ميه في الصينيه ودخليها الفرن نص ساعه هتطلع تجننننن بجد

6- صينية البطاطس المهروسه في الفرن:

جيبي حبات البطاطس واسلقيها لحد ما تتهري واهرسيها بالشوكه وحطي عليه بيضتين وملح وفلفل وبقدونس وشبت وبهارات واهرسي الخليط كويس اوي وهاتي صينية ادهنيها بنفطتين زيت زيتون وحطي نص البطاطس فيها وافرديها وحطي طبقة تونه او سوسيس او فراخ مقطعه مسلوقه او بالصلصه وغطيها بالنص الثاني من البطاطس وعلى الوش افردي بيضه مكسورة مع حلقات فلفل ةزيتون وطماطم ودخليها الفرن نص ساعه هتطلع تحفه جدا

اتمنى ان تكون الوصفات حازت على اعجابك وان تكونى اكثر صحة وتألق