طريقة عمل بقلاوة بالمهلبية

بقلاوة بالمهلبية من الحلويات اللذيذة جدا والشهية والبسيطة فى عملها ولذلك جئنا لك باسهل طريقة لعمل بقلاوة بالمهلبية لنتابع سويا المكونات وطريقة العمل:

المقادير:

لفة جلاش
2 كوب لبن
نصف كوب نشا
كوب سمنه سايحة
فانيليا
شربات

الطريقة:

1-لتحضير المهلبية قلبي اللبن مع النشا ودوبيهم مع بعض وضيفي عليهم الفانيليا وحطيهم على نار هادية مع التقليب المستمر لغاية ما الخليط يتقل معاكي وبعد كده اطفي عليه النار وسيبيه يبرد

2- افردي نصف كمية الجلاش في الصينية وبين كل ورقتين ادهني طبقة خفيفة من السمنه وبعد كده حطي المهلبية الباردة على الجلاش بس راعي إنها ما توصلش للأطراف علشان ما تتحرقش منك

3- رصي باقي كمية الجلاش فوق المهلبية وما تنسيش تدهني السمنه بين كل ورقتين جلاش وبعد كده قطعي الجزءاللى فوق من الجلاش بالطريقة اللي تحبيها بس ما توصليش بالسكينة لحد المهلبية علشان ما تطلعش لبره وتتحرق وبعد كده ادهني وجه الجلاش بباقي كمية السمنه ودخلي الصينية في الفرن وسيبيها لمدة 30 دقيقة أو لغاية ما وجه الجلاش يحمر

4-طلعي الصينية من الفرن وصبي عليها الشربات البارد

5- لتحضير الشربات

قلبى كوب سكر مع كوب مايه وعصير نصف ليمونة وحطيهم على النار لغاية ما الخليط يغلي وبعد كده قللي درجة الحرارة وسيبيه لغاية ما الشربات يعقد وبعد كده ارفعيه من على النار وحطي عليه الفانيليا وسيبيه يبرد.

اتمنى ان تكون الوصفة حازت على اعجابك وتكون استفدت معنا