الكفتة المشوية بطريقة سهلة

الكفتة المشوية من الاكلات التى يعشقها الجميع والمناسبة جدا فى العزومات والمناسبات السعيدة وهى سهلة وبسيطة ومعنا سوف تتعرفى على اسهل طريقة لعمل الكفتة المشوية الشهية:

المقادير:

1/2 كيلو لحمه مفرومه يكون فيها نسبه دهون
1 حبة بصل كبيرة
1 قرن فلفل اخضر
1 معلقة دبس رمان
1 معلقة مسترده
1/4 كوب بقدونس مفروم
1 معلقة بقسماط كبيرة
ملح وفلفل اسود
معلقة صغيرة توابل لحمة
شطه حسب الرغبه

الطريقه:

هنفرم اللحمه ناعم جدا حتى لو اشترتيها مفرومه حاولى تفرميها تانى فالبيت علشان تنعميها زياده

هتجيبى البصله تفرميها لوحدها ناعم وتعصريها كويس تحطى تفل البصل عاللحمه المفرومه وتشيلى ميه البصل على جنب علشان هنحتاجها

هتفرمى البقدونس والفلفل الاخضر ناعم برضو وتحطيهم على اللحمه المفرومه والبصل

هتضيفى معلقة البقسماط على اللحمه المفرومه وتضيفى الملح والفلفل الاسود وتوابل اللحمه ودبس الرمان والمسترده واعجنيهم كلهم مع بعض وياريت بقى تفرميهم تانى مع بعض فالمفرمه علشان كل المكونات تختلط كويس اوى وتنعم اكتر ( لازم الكفته تكون ناعمه على قد ما تقدرى علشان لما تفرديها عالاسياخ مش تقع منك )

هتحطى الكفته فى التلاجه بعد ما تغطيها بكيس نايلون وتسبيها من ساعه لساعتين فالتلاجه

هتطلعيها من التلاجه تكونى مجهزه الاسياخ الخشب ونقاعها فى ميه لمده نص ساعه

هتاخدى قطعه كفته وتكوريها فإيدك وبعدين تفرديها على السيخ الخشب وانتى بتفرديها تبلى ايدك بميه البصل وتبلى بيها الكفته بعد ما فردتيها على السيخ الخشب وتعملى كل كميه الكفته بنفس الطريقه

هتكونى مجهزه الجريل وتكونى سخنتيها عالنار كويس اوى وترشى فيها معلقتين زيت اول ما يسخن هتحطى اسياخ الكفته فالجريل على نار عاليه علشان تاخد صدمه وتحتفظ بالعصارة بتاعتها

هتقلبى اسياخ الكفته باستمرار عالجريل لغايه ما تستوى من كل الاتجاهات هتكونى جهزتى فحمه مولعه وتحطيها فى وسط الكفته فى قشرة بصل او ورقه فويل وترشى عليها رشه زيت وتغطى الكفته تشرب ريحه الفحم

وقدميها فى طبق التقديم مع سلطات وبطاطس محمره وبالف هنا